恒生銀行（011）執董馮孝忠（Andrew、圖）唔係執到金，直情係俾金圍，隨時發夢都見到金。事緣恒生新近推出金條，Andrew粉墨登場做宣傳，相中呢堆金條價值1.3億，重330公斤，超過五個馮孝忠咁重。
模特兒或女藝人配戴名貴珠寶首飾影相，成日話最驚跌咗粒石或整唔見，Andrew今次走入恒生夾萬裏面同堆金影相，夠晒安全，何況咁重，想跌都難。唔講唔知，Andrew喺銀行界咁多年，見慣風浪，竟然係第一次俾咁多金圍住，佢話「真係幾燦眼㗎！」
講番呢堆金條，恒生往年只有5克、10克同20克細size，今年就推100克同10盎司，以周二現貨金價計，分別賣4.3萬同13.38萬。存款息咁低，買番幾條重秤金條來保值都好，還掂𠵱家樓價咁貴，想買磚頭都好難。