蛇歲新春，原來香港養蛇者眾，當中不乏美少女。有鋼琴老師弱質纖纖，家中卻養了13條蛇，「見到佛地魔出場，我會零舍興奮！」佛地魔是《哈利波特》大奸角，靈魂寄居蛇身。恕記者想像力不夠，幻想不到佛地魔彈鋼琴。
《聖經》中，蛇是魔鬼的化身；希臘神話有蛇髮女妖美杜莎，任何人正視其雙眼都會變石像。可見自古至今蛇與邪惡劃上等號，可她偏偏愛蛇如命，試過狠飛怕蛇的男友，甚至願為這些冷血動物拒絕生育。
不過專家警告，蛇乃獨居動物，不適合當寵物，喻市民勿跟潮流飼養。記者：潘婉玲 攝影：胡堅
若說一朝被蛇咬，十年怕草繩，「女版佛地魔」王紫瑩（Blue）幾輩子也要跟繩索絕緣。「試過餵佢哋，佢哋將我隻手當食物，咬咗我一啖！」但愛蛇之心與生俱來，小學年代，同學仔愛的是美少女戰士，玩的是四驅車，她卻愛看《國家地理頻道》中這種全身佈滿鱗片的無足生物。
養13條蛇照顧周到
三年前終於擁有第一條寵物蛇，至今已擁有「13太保」，其中11條是球蟒，兩條是粟米蛇；雖說全部無毒，但還是讓記者寒毛直豎。
王紫瑩把蛇當仔女看待，每條獨立放置於透明膠箱「劏房」中，箱叠箱地放在電腦房內。她甚至噓寒問暖，箱底鋪暖毯，將溫度維持在25℃以上，儘管夏天房內酷熱，也不開冷氣，寧願滴着汗上網。每星期還逐條替牠們浸浴、磅重，無微不至。
蛇不像貓狗般懂得嗲人，供吃供住，最後換來一身傷，是犯賤嗎？「呢個係佢哋嘅本性嚟㗎嘛！」說到底，是愛上蛇的甚麼？「覺得佢哋啲紋好靚，而且性格同我好似，我比較獨立，自己行街食飯都好享受」。
王紫瑩指着唯一的白化球蟒，是她最愛，「佢最乖，又最黐人，一攞上手就會纏住你」。又話鍾意獨立？「間唔中黐下都可以嘅」。她就像父母看見子女長大，老懷安慰地說：「睇住佢哋慢慢成長，由蟲仔咁細，變到咁大，花紋慢慢變化，見住佢吞老鼠嗰刻，就覺得佢地好有生命力。」
吞老鼠？她二話不說打開雪櫃冰格，在餃子凍肉堆中拉出一個膠袋，裏面是十多隻雪至僵硬的死老鼠。餵飼前要先解凍，一星期食一餐，每條每次食兩三隻，「我細佬話接受唔到，叫我買多個雪櫃，邊度有位擺呀？」
老公充大膽奪芳心
不是個個男人都像《白蛇傳》中的許仙愛蛇，前男友就因為膽小而被狠飛。三年前金蛇郎君出現了，首次約會的節目還是睇蛇，他為了追得美人歸，口說不怕，其實嘴硬骨頭酥，嚇到全身僵硬，卻又容許女方把蛇寄養在自己家中，如此大愛，Blue無以為報，惟有以身相許，「所以咪嫁畀佢囉，哈哈！」
這次訪問，攝影師要求「放蛇」，讓寶貝們活動一下，當然事先記者已作好逃跑的準備，「10幾條放晒出嚟，冇可能，捉唔切㗎，除非你兩個幫我」。這場談判記者輸了，也慶幸沒有勝出，被她甄選出籠的四條蛇，最後有兩條鑽進梳化底。始作俑者的攝影師要搬梳化讓Blue搵仔，「試過有朝起身，發現唔見咗一條，結果喺櫃入面搵番，好驚佢爬咗出街」。大人尚且倒瀉籮蟹，學生豈不屎淋尿瀨？「其實小朋友先唔驚蛇，有個學生次次上完堂都話要玩蛇，好開心」。若將來生兒育女，老爺奶奶不容許養蛇怎辦？「咁我寧願唔生喇！」
蛇不需要朋友 諗清楚先養
有養蛇經驗的獸醫余志軒批評，不少人養蛇都是一時衝動，卻不了解動物習性，「覺得條蛇悶，所以畀個公仔佢玩，點解蛇會玩公仔呢？蛇係唔需要朋友，你亦要尊重呢個事實」。余醫生認為，照料爬蟲類動物比貓狗難道更高，「佢哋要食老鼠，你唔可以逼佢哋食雞翼，佢哋唔會適應同人住。蛇每星期要餵一次，一次唔食嘢，主人餵幾次都唔食，可能條蛇已經病咗幾個月，已經好病，救唔番」。
香港兩棲及爬蟲協會行政總監段國樑解釋，不管寵物蛇有毒無毒，也應先剝牙，更不應放蛇周屋爬，「蛇同其他爬蟲類唔同，蛇係有攻擊性，龜嘅話你唔搞佢就唔會理你，蛇唔係」。主人亦須經常留意蛇的神情及舉動，「如果有啲異常舉動，譬如伸到直一直，佢可能有病，或者度緊位襲擊你」。
