搞鬼嘅里昂風水指數又出籠，今年仲幫城中熱話人物特首CY同香港電視（1137）主席王維基批命，唔知真心定玩嘢，里昂從八字圖睇出，CY「很可能也厭惡偽善」；至於王維基攞唔攞到免費電視牌照，里昂贈佢一句「耐性」。睇完後，突然諗起嗰句：風水佬呃你十年八年!
唔知點解，里昂同CY批命，先諗起中環一間炸魚薯條餐廳，話如果當CY係魚，會係條乜魚呢？選擇有三，內心粉紅嘅三文魚、有海狼之稱嘅鯊魚，還是視野受限嘅比目魚呢？里昂都話好難有定論。
講到CY運程，里昂就搬出唔知邊位老媽嘅金句，指「醜人脾氣好」，推斷CY蛇年運勢唔錯喎。
魔童攞牌唔等得
至於日夜都掛住個電視牌嘅魔童，里昂簡單贈佢「耐性」兩個字，又批佢今年將受挫折，投機可免則免。不過，里昂熟知魔童脾性，預佢唔會將忠告擺上心，即係聽唔入耳。咁就梗係啦，有七百幾人跟住佢搵食，攞唔攞到牌係關鍵，睇住日日燒錢嘅耐性，真係能人所不能！
除咗CY同王維基，里昂亦喺本港金融界當中，搵來富豪酒店（078）太子女羅寶文來批一批，基本上係大讚一番，指佢跳級入讀大學，「無論怎麼看，她都是個好女孩，而且顯然能經得起大風大浪」。唔知仲以為有人向羅小姐示愛，反正情人節就到，羅小姐好似仲係單身。
李華華
mailto:[email protected]
