狼英上任以來，鑊鑊新鮮鑊鑊甘，相信死敵唐唐食咗唔少花生送紅酒。唐唐咁開心，賣紅酒都賣得高調過人，仲要佳士得專誠為佢舉行一個拍賣會。
不過點解要揀呢個時候出貨呢？正如陶傑噚日喺《爽報》社論所講，估計係唔睇好大陸未來嘅購買力。
大家諗吓，內地領導班子剛上場，新官上任三把火，近日就作出多個疑似積極打擊貪腐嘅行動。
好似近日再傳將整頓澳門叠碼仔，打擊洗黑錢活動；更爆嘅係，珠海國企高管周少強，因為一夜晚宴開咗12支貴價紅酒，開公數4.7萬銀而被停職。唔好玩啦，菲菲相信以內地「炫富」風氣咁盛，12支相比起其他高官嚟講，簡直係濕濕碎，今次當局作出嚴懲，無非都係想殺一儆百。
又打貪又反鋪張，怕且強國官員以至國企高管，短期有錢都唔敢使啦。內地高級佳釀最近竟一反常態，於春節前劈價，證明中央出手戮破酒價泡沬爆破。唐唐呢個時候沽貨，仲唔係睇淡後市？
Fifi
本欄逢周二、四刊出