劏房波頭頭碰着黑，似乎想喺新一年改運，唔只轉咗個超短嘅髮型，連眼鏡都換埋，佢噚日話對呢個新髮型感到好意外，估唔到髮型師咁重手。講番副新眼鏡，劏房波話係近排同老婆一齊換，副鏡出自一個本地品牌，成副配咗幾千蚊。劏房波講到興起時，仲即時除副眼鏡落嚟畀記者睇，話可以全副拗直都無問題，唔易整爛，八方覺得官員戴去維園行花市最啱，唔怕被狙擊敗走下跌爛眼鏡嘛。
講起情人節點過，劏房波話未決定，但突然話做老公最緊要「三從四德」，「三從」包括太太說話要聽從、太太Shopping要跟從，太太做錯都要盲從。至於四德，劏房波只講得出兩德，就係生日同結婚紀念日都要記得。講得出老婆做錯都要盲從，難怪老婆搞劏房，劏房波都覺得冇問題啦。