80後的吳穎詩，海外上市殯儀集團高級業務經理，首批接受培訓的準禮儀師。月前隨機構前往武漢及重慶參加殯儀展，見識兩岸三地殮葬殯儀業發展，還在展銷會上首度粉墨登場，扮演躺卧在冰冷棺木內的先人！工作期間，她遇過失去父親的孩子、因為葬禮被迫困獸鬥的不和家庭，還有擔心身後凋零的孤苦老人。慣見生死，所以百無禁忌。記者：呂麗嬋
「殯儀係傳統行業，運作好神秘，三年前我因為好奇所以入行。中五畢業，原本喺間福利機構做籌款工作，咁啱有間骨灰龕請人，負責推銷龕位，誤打誤撞入行，輾轉又由龕位營業員，轉職𠵱家服務嘅殯儀集團。
呢個行業傳統上安排身後事嘅師傅大都自僱，又行徒弟跟師傅制度，外人好難入行。我係公司首批直接聘用嘅員工，乜都一腳踢，雖然辛苦，但好處係乜都有機會學。上年底我就跟公司返內地做殯儀展銷同交流，見識唔同地方嘅殯儀業發展。
內地有專上學院培訓人才，唔同地方嘅儀式、化妝技巧、各地禮儀，分門別類，仲好似香港中學咁，Band 1學院嘅學生，未畢業已經好多機構搶住用。喺台灣又有遺體SPA嘅課程，為遺體按摩，令冷涷咗嘅肌肉變得柔軟，面容同體態會安詳好多。
於內地展銷會偷師
佢哋仲會為先人製作紀念短片，供告別儀式時播放，有啲人仲會放上YouTube。反觀香港，唔好話SPA，香港人因為睇咗日本電影《禮儀師之奏鳴曲》而認識禮儀師，但真正接受嘅人其實唔多。
唔單止咁，喺公開示範時，我仲有機會扮演瞓喺棺木入面嘅先人！其實呢個係每個禮儀師必經嘅階段，除咗技巧，你仲要切身處地代入被你服務對象嘅角色。好多人覺得難以接受，但做得我哋呢行，每日近距離接觸死亡，早已百無禁忌。
喺靈堂遇到嘅都係傷心人，與父親不和嘅女兒、遺下年輕內地妻兒猝死嘅爸爸。遇過喪父嘅孩子大吵大鬧，好辛苦先氹到佢上車，寫低電話，諗唔到當晚就收到孩子來電，後來仲成為我嘅忘年朋友仔。或者喺好多人眼中殯儀服務係厭惡性工作，但其實好有意思，除咗讓早走一步嘅朋友，可以有尊嚴咁離開，仲可以安慰在生嘅人，你話幾好？」