年初一有英超壓軸好戲上演，由榜首的「紅魔」曼聯迎戰愛華頓；於年初二睇完煙花，深夜亦可欣賞英超獨腳戲「紅軍」利物浦迎擊西布朗；兩支紅衣兵團近期走勢不俗，誓要由龍年紅到蛇年。
紅魔雙箭輪流發威
紅魔於英超走勢相當凌厲，對上13仗取得11勝2和，主場更是9連勝，現時已領先同市宿敵曼城9分。上季曼聯於英超迎戰愛華頓曾一度領先兩球下，結果被逼和4:4，間接令紅魔最終失落聯賽冠軍；領隊費格遜早前就表示，球隊今季絕不會重蹈覆轍：「縱然我們目前有不錯的領先優勢，不過於餘下每仗亦不可大意，否則球隊將會再次將聯賽冠軍拱手相讓。」然而，曼聯今季有荷蘭神鋒尹佩斯加盟後「紅」運當頭，拍檔朗尼亦於新一年及時回勇，相信曼聯於新正頭勢可主場食「糖」。
至於紅軍近期表現亦上力，上仗作客曼城雖然最終被逼和，但於該仗踢出今季代表作，且於近6仗英超主場贏5場，最近更取得主場3連勝；故在年初二迎戰西布朗時，適逢對手越踢越沉，紅軍誓必於蛇年首仗響頭炮。