香港同台灣兩大女神Angelababy同陳妍希，前晚同台灣型男柯震東喺鑽石山為新戲《在一起》宣傳，過百龍友同街坊逼住圍觀型男索女，只可惜Baby同陳妍希都只係露吓膊頭，守身如玉。
新年去印度
嚟緊就係農曆新年同情人節，柯震東會同家人去印度玩，咁女友蕭亞軒點呀？柯震東話女友唔去。之前柯震東喺訪問中話蕭亞軒唔係佢永遠嘅女生，有傳搞到女友唔開心，佢否認：「沒有，不會為無聊新聞不開心，只是傳遞訊息錯誤。」咁究竟女方係佢永遠嘅乜嘢？柯震東就只係話「沒有」喎。
喺戲中演一對嘅Baby同柯震東喺後台玩頭貼頭自拍，男方仲貼上網，唔少fans都大讚佢哋好襯，甚至更有蕭亞軒嘅fans留言叫佢哋索性喺埋一齊，咁蕭亞軒就唔使俾柯震東嘅fans狂鬧。
此外，Baby同陳妍希喺農曆年期間不約而同要去紐約出席時裝周，所以Baby情人節會喺飛機上同陳妍希一齊過。陳妍希笑話：「那你（指Baby）就當我的情人，大家交換禮物。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/