華創（291）講咗幾年的大型啤酒收購，終於都有米落鑊，旗下雪花啤酒以66億元，買咗香港人好熟悉的金威（Kingway）。不過呢單deal，可以話係華創被「迫上梁山」之作。佢買嘅原因，絕對唔係因為價靚（平均每噸作價高於過去10年水平），亦唔係因為資產好正（金威過去六年有三年都蝕錢），而係要避免品牌俾人買咗去，尤其係近年來勢洶洶的外資百威英博。
百威英博近年係內地大舉收購和擴產，成績斐然。經典作係04年天價搶到哈爾濱啤酒，之後成功做起，透過贊助世界盃呢啲宣傳，將寂寂無名的地區啤酒，變成全國品牌。業內人士都估百威英博未來應可追過燕京，成為全國排名第三的啤酒公司，劍指現時排第二的青啤（168）和第一的雪花。有證券界朋友仔都話，華創管理層曾不下數次向佢提起當年，好後悔冇買到哈爾濱啤酒，結果俾百威英博搶咗，就畀個位佢攝咗上嚟，終於𠵱家後患無窮。
百威英博最近又想買喺江西省具有領導地位的南昌啤酒，而青啤就搞平價品牌有聲有色，走主流路線的雪花，第一地位未來岌岌可危。錯過一次，華創呢幾年大把硬仗要打。
海迪