【峯語戀之表白愛意】一直備受無綫力捧的林峯，在年頭奪得最受歡迎男歌星獎，踏上事業高峯後，對事業及愛情的態度作了大轉變，繼曾宣佈隨時會退出娛樂圈後，昨晚擔任《勁歌金曲》嘉賓時親口承認與吳千語的戀情，「峯語戀」正式曝光，他強調做男人應該做的事。
現年33歲的林峯一直被傳與19歲新晉女星吳千語因拍電影《男人如衣服》而撻着，早前林峯開演唱會，吳千語公然現身撐場，林峯還公開對住緋聞女友大唱情歌《BB》，冧爆之情路人皆見，還經常現出一副含春樣，之前有消息指林峯租屋金屋藏嬌，但他始終未有承認吳千語女友身份。
公佈拍拖鬆口氣
昨晚林峯在將軍澳電視城任《勁歌金曲》嘉賓，主動向記者表示有事要嚴肅宣佈，原來是公開給吳千語女友名份，林峯說：「我工作以外少講感情，前排有報道影響到我愛錫嘅人，包括家人，作為男人要以正視聽。」林峯澄清他並沒有租屋給人住，不想扭曲了大眾印象，他亦為此事感到不開心及嬲怒。林峯一輪嘴說：「人哋冇必要要俾人評論，我要做番我要做嘅嘢，保護女方，人哋家境唔錯，係好女仔，我關心嘅人。」
林峯一輪嚴肅表白，雖未有提及女方姓甚名誰，但原來是愛的宣言，及後他被記者問是否跟BB吳千語拍拖，他直認不諱：「係！作為男人，做應該做嘅嘢，我哋拍咗一段日子，唔希望大家戴有色眼鏡睇佢，我唔係高調，係做男人做嘅事。」而他強調沒租屋給女友，亦沒有同居。
林峯透露未有見過女方家長，但女友卻曾遇過他的家人，至於女友有何吸引，令他繼潘霜霜後給與女友名份，林峯說：「佢係好女仔，𠵱家公佈咗都會鬆口氣。」是否女友哭訴要澄清？林峯說：「冇，我有自主權。」樂易玲是否獲通知？他只謂樂小姐並沒有否認過，他希望獲得歌迷及大眾的祝福。
不過林峯宣佈戀情後，卻得不到歌迷祝福，吳千語微博即時被林粉攻擊，辱罵她是X子，襯不起林峯。
採訪：王崇穎
攝影：陳俊強
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/