狼英之前去維園行花市，結果俾社民連長毛佢哋突圍狙擊之餘，狼太仲俾個「你呃人」咕𠱸打中，嚇到花容失色，但八方見到狼太冇穿冇爛，睇嚟都冇乜實質損失，反而採訪狼英嘅無綫小花陳嘉欣就冇咁好彩。
話說當時人頭湧湧，成班記者、攝影師跟住隻狼走，全部變晒人肉三文治；狼英敗走、人群散去後，陳嘉欣先發現兵荒馬亂之際，竟然好似灰姑娘咁甩咗隻鞋喎，逼住半赤腳喺維園做嘢！
有網民將陳嘉欣赤腳相放上高登，一班嘉欣BB粉絲即刻心都痛埋，好關心佢搵唔搵得番隻鞋；有高登巴打即刻話，如果俾嘉欣BB嘅粉絲執到，梗係第一時間珍藏，仲會畀番女神咩！