嚟緊3月升呢做政協常委嘅唐唐，忽然間攞批紅酒出嚟賣，成為中環熱話，冇理由係手緊到要套現啩？如果有人咁諗，就真係太低估唐唐嘅豐厚家底嘞。查實唐唐之所以賣酒，可能係佢嘅珍藏真係多到瀉；佢身邊老友爆料，話唐唐試過一次過入成400箱酒，多到日日用嚟沖涼當spa咁浸都得㖭呀。
去到邊買到邊
唐唐今次攞出嚟拍賣嘅酒都比較平民化，最平嘅300幾蚊就有交易。有唐唐老友話喎，唔排除呢啲酒係佢去隱世酒莊試完酒「唔覺意」買落，事關無紅酒不歡嘅唐唐，去到每個酒莊都幾乎會入貨㗎，而且數量唔會少。
佢記憶中，唐唐有一次就好鬼豪氣，試完酒就一口氣話要掃400箱貨。嘩，400箱唔係4支喎，嚇到佢嘅同行友人都呆晒，猛話太多嘞，但唐唐就樂在其中。雖然唔係次次都買400箱，但唐唐每次出手都唔會低㗎嘞，有政商界中人已經話，佢可能係亞洲藏酒最多嘅名人之一。
至於點解呢個時候先散貨？佢老友估計，可能佢呢排比較得閒，可以去私人酒窖點算珍藏，發現買落嘅紅酒多到瀉啩。而拍賣之日，唐唐料已榮升政協常委，睇怕佢嘅紅酒拍賣價亦同時升呢。
mailto:[email protected]