美聯物業（1200）慶祝完四十周年，似乎有人想再「贈興」，噚日傳出高層地震消息，指兩位執行董事陳坤興同黃子華唔做，咁啱老闆黃建業唔喺香港，搞到兩位急急澄清，指傳聞屬流料。
「有人妒嫉」
兩位當事人對於離職傳聞頴晒頭，仲要諗盡理由去解釋。陳坤興估計，公司早排向前線同後勤工大派500蚊獎金，總共派咗兩球，令到士氣大振，「唔知係咪有啲人見到我哋咁團結，唔抵得」，又指「不招人妒是庸才，我諗係有人妒嫉啩」。
黃子華好無奈咁話：「我真係唔識講，一陣傳我瓜柴，一陣傳我入院，日日咁講，唔掂噃！」「如果我被炒，我會叫你快啲同我傳出去，等其他老闆知道，然後請我，我都驚冇嘢撈㗎」。
查實美聯係上巿公司，有董事變動係要出通告，不過空穴來風，未必無因喎。