由周星馳執導電影《西遊．降魔篇》昨晚假又一城舉行首映，前日星爺和舒淇在內地宣傳時錫手又錫臉，星爺笑說：「冇辦法啦，我一直都咁好，舒小姐就睇心情，佢心情靚我都得益。」問星爺是否男友人選？舒淇識做說：「梗係，幽默風趣又有才華。」星爺扮緊張追問：「仲有呢？」舒淇再答：「得意囉，佢係好多人偶像，我高攀唔起。」
舒淇否認跟馮德倫在美國秘婚，她黑面說：「係呀，生埋兩個仔喺美國，得閒去睇吓。」問是否姓馮？她求其說：「乜都有。」在台上進行儀式時，司儀黎芷珊要求錫錫，舒淇即主動啜了星爺面珠一啖，然後扮抹嘴，星爺亦冧爆回吻舒淇，兩人交足戲。
周秀娜着透視裙亮相，透露星爺幫她改花名：「佢叫我喜劇菠蘿包，外面卜卜脆，裏面好鬆化。」問星爺有冇媾她？娜姐笑說：「輪都輪唔到我。」
此外，患癌的張達明昨晚現身撐場，他表示曾跟星爺合作過拍戲，問是否已全面康復？他說：「未得，手未活動自如，神經腺未好番晒，但我想出多啲街做正常人。」他透露現跟陳子聰合作度橋，未知會否復出幕前。
採訪：魯萍
攝影：陳志嵐
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/