曼聯嘅艾拉同車路士嘅艾殊利高爾（A高），除咗同膚色、同位置以及同號碼之外，估唔到連玩女嘅喜好都一樣，都係鍾意玩孖妹。法國國腳艾拉日前就被英國小報踢爆喺禮拜三友賽德國之前，約埋紅魔隊友路爾斯安達臣，齊齊去巴黎鬆一鬆，大戰A高年幾之前玩過嗰對《花花公子》姊妹花，仲同A高做埋襟兄弟㖭！
一行7人會所喪玩
英國《太陽報》日前就報道，曼聯嘅法國左閘艾拉喺禮拜日晚，約咗上圍有成32DD嘅孖生姊妹卡娜同埋瑪莉莎，去巴黎香榭麗舍大道一間私人會所玩。有好嘢梗要同人分享啦，呢位31歲嘅英超球星亦約埋4個朋友一齊去食好嘢，當中包括佢嘅24歲紅魔隊友路爾斯安達臣。消息話，艾拉佢哋一行7人喺間會所度喪玩，期間仲點咗支2萬鎊（約24萬港元）嘅香檳，出手認真闊綽；大約喺清晨6點半，佢同路爾斯安達臣就帶埋呢對22歲嘅英國孖妹返酒店，聽講對孖妹仲喺酒店張床食埋早餐，之後喺禮拜一晏晝1點半先至走人。
我求大俠翻查資料，原來有「英超百人斬」之稱嘅A高早喺前年10月，都玩過呢對本身係《花花公子》玩伴嘅英國孖妹，但佢就冇好似艾拉咁大方同隊友分享，只係自己去倫敦嘅Playboy Club同佢哋兩姊妹玩3P。話時話，艾拉雖則結咗婚兼有個小朋友，但仲係好爛玩；早喺2010年，佢就喺酒店畀部閉路電視影到同個衣着性感嘅學生妹打茄輪，所以佢好似A高咁識食玩孖妹，真係一啲都唔奇。
艾拉又背住老婆偷食
但係，法國隊喺禮拜一有操練，艾拉前一晚居然仲去玩女，而且過份到玩天光，據報雄雞兵團主帥迪甘斯經已同佢照咗肺。不過，我求大俠相信艾拉會擔心俾曼聯領隊費格遜鬧多啲；事關老費極度重視球員場外言行，𠵱家艾拉斷正，兼且仲要叫埋曼聯隊友路爾斯安達臣，真係罪加一等，睇嚟罰錢就一定走唔甩㗎嘞。仲有就係，佢背住老婆姍迪娜去偷食，唔知返到屋企使唔使跪榴槤呢？
知多啲：紅魔兵爛滾
曼聯查實近年都有唔少性醜聞。好似喺07年9月，路爾斯安達臣就同拿尼，去咗現已過檔皇家馬德里嘅基斯坦奴朗拿度位於柴郡嘅豪宅，同5個應召女郎大搞性愛派對。至於朗尼就喺老婆高蓮懷孕期間，同妓女珍妮湯遜瞓過7次，每次仲豪花1,200鎊。另外，傑斯喺前年5月被揭發勾二嫂，瞬即由好好先生變成世紀賤男。