有讀者在我的臉書留言問我，是否抱恙或已收爐遠遊，所以要勞煩小秘連續執筆，在此多謝諸君關心。我精神狀態很好，尤其是上周末跑完那50公里，感覺實在欲罷不能，猶似都未踩盡油就要收掣。至於小秘說的「輕鬆捧盃」卻是托大之詞，盃是捧了，心底卻非「輕鬆」。
剛還在說賽事臨場發揮理想，怎忽然又會「身心」不協調？其實就是因為一些部署的失誤，最終竟以兩分多鐘之差將冠軍拱手相讓。得悉賽果之後，想起《一代宗師》裏二小姐的話：「說人生無悔，那是賭氣的話，如果真無悔，該有多無趣啊。」是啊！嗰日真係點只十個「趣」！
不過小秘如此口乖，豈會無因，又或者咁積極自告奮勇代勞，又點會唔係別有用心。一切都要由咸豐……仲要再早370年嘅成化年（明憲宗）講起。我對明史不甚了了，更沒有收藏的風雅，但係機緣巧合下竟藏有一個三呎高的成化年製的瓷瓶。
好幾年前，襄助一位世叔伯處理了一些私務，他執意圖報，我已多番推卻，直至他說要移居他國，且不想有太多身外物隨行，所以臨走前託個孤（樽）予我，並囑咐要好好看待，嗰陣未睇孤星淚，唔係定大有感觸。查實我份人至怕心有牽掛，他人身外物無端變咗我嘅心內事，始料未及也。
明朝古玩變花樽
然已從命，惟有費心安頓，吾舍設計有既定風格，再者盧太執掌家政，其門難進。最終只得暫存公司，也不失為接待內地訪客時的好話題，尤其這幾年強國炒賣古物風氣熾熱，內地幾乎每人都是半個專家，吹得頭頭是道，我亦佯聽得津津有味。不過，如果他們前兩天到訪，也該會給我的陣勢唬住。
皆因公司最近搬遷，有不少東西要待地方準備好才重新安放，當中包括我的家當。嗰朝返到新寫字樓，有同事正安排送貨啲人擺放門口桃花，就瞄了那一眼，差點就暈了過去。我以為還未拆卸保護包裝的瓷瓶，今大剌剌的擺喺一包布底座上，周遭繞着紅帶，中開插咗株大桃花，明朝古玩都係用嚟插花咋！內地豪客都望塵莫及！
剛巧小秘路過前台，見到我成隻木雞咁棟喺度，再望吓嗰花樽，平時點裝酷都要花容失色，佢應該係醒起自己仲未出花紅。到底邊個要問責自是後話，但係小秘急於獻文，負筆請罪卻是不爭事實。
盧先亞