人到中年仲講理想，認真唔容易，除咗有金更加要有心，金管局早前公布，年近五十嘅助理總裁劉應彬，辭職重返校園。噚日喺中環見到Edmond（劉之洋名），捉住佢吹水，大談佢9月開課大計，對於呢位既有實戰經驗、人品學養又極佳嘅金融監管專家，真係十二萬分唔捨得。
讀邊間大學賣關子
原來Edmond剛入讀港大社會科學系時，已心思思想翌年轉讀社工系，點知兜兜轉轉冇轉到，估唔到近30年後，圓周又番到起點，一嚐多年埋藏喺心底嘅社工夢。
至於全職入讀邊間大學嘅碩士課程？佢就賣個關子，只透露若然合適，希望可擔任前線社工，為年青一代略盡綿力，但係都好驚自己追唔上新一代嘅脈搏。
踏出呢一步，佢話係人生一大挑戰，「若果今年唔做，應該太大年紀唔會再諗」，喺金管局做到退休。正所謂人生有幾多個十年，Edmond兄，衝呀！