嘉華國際（173）主席呂志和長女呂慧瑜熱愛歌劇，促成嘉華最近向香港歌劇院贊助1,000萬，支持歌劇院未來四年發展，希望藉此推動本港藝術教育同人才培訓；呂慧瑜早排更加同著名男高音兼佢老師莫華倫同台表演。
呂慧瑜認為，每個人都有藝術細胞，只係未被發掘。佢都係因為識咗一班鍾意唱歌嘅朋友，第一次喺K場唱歌，發覺自己把聲幾吸引，加上感到鄧麗君唱歌好有感染力，從此愛上聲樂。
捐千萬撐歌劇
上月底香港歌劇院舉行十周年籌款晚會，呂慧瑜出錢出力，獨唱一曲《Sound to the Moon》，又同莫華倫用意大利文高歌一曲《Non Ti Scordar Di Me》，意思係「請你別忘記我」。
講完自己，呂小姐不忘為公司賣廣告，指嘉華國際之所以叫做乜乜國際，就係希望能夠推動香港作為國際城市，「如果一個城市缺乏藝術，就會好單調」咁話。