「邊個話打功夫同舞獅唔可以靚、潮、勁？」無錯，係靚潮勁！粉紅色Gel甲、翹起三毫米的濃黑眼睫毛，還有一個金髮潮爆化妝師，安坐一旁任聽差使，人稱「辣椒仔」的碩士武館女當家歐陽秀明（Tiffany），港女造型，在陽盛陰衰的武館，以柔制剛，一樣力發千鈞！記者：呂麗嬋
每逢農曆新年，總是醒獅的旺季，其中尤以夏國璋掛帥的夏門最負盛名。Tiffany正是夏家第四代傳人夏敬文的妻子，也是集團新任董事總經理。在清一色男性主導的武館，萬綠叢中一點紅，難得這個年僅26歲的阿嫂，人人前倨後恭，還交棒讓她為百年祖業把脈改革。「我嘅愛情、事業、所有未來都押落去，不容有失！」年輕女當家哈哈大笑。
MBA出身能文能武
「都說富不過三代，敬文正係第四代，唔驚就假！」外型似尋常靚女OL的Tiffany，柔弱嬌小，卻同樣出身武術世家。3、4歲開始習武，打鑼鼓、舞獅頭、上樁，無一不精。只是能文能武、讀MBA出身的她，早看出傳統武館的困局，「家庭式經營，少新血加入，業務走下坡，請你醒獅嘅企業，覺得你冇新意，係切身嘅生存問題」。
與夏敬文拍拖多年，由徒弟變成愛侶，然後結婚，嫁入夏門，16歲已跟定一個他，Tiffany不諱言，最怕的是祖業不保，「未全職加入武館前，我喺機場做嘢，企喺書局打書釘，睇咗本關於CEO嘅天書，富不過三代，真有其事，武館唔現代化、企業化，遲早玩完！」女人就是有股狠勁，這個新任女當家字字鏗鏘：一係唔改革，一改就要激！
在中學兼職教醒獅的她，就以夏家之名，成立全港首隊全女班醒獅隊，自己扮靚靚做生招牌，自創Hip-hop舞獅、閃燈獅及透明花式水鼓；仲搵設計師為女隊員轉新裝：閃亮小鳳仙裝、OL櫃桶必備的Legging，全部出籠，「我好細個就練功，女仔舞獅清一色黑色功夫鞋，同男仔一樣闊袍大袖功夫裝，老套又肉酸，想叫年輕人學都好難！」
深知靚和潮，是吸引年輕人的元素，只是顛覆傳統，難免惹來花拳繡腿、不務正業的閒言。「最初都唔太接受，好多人講笑咁話，如果夏老先生（夏國璋）仍然在生，見到啲南獅北獅搞到咁，一定激死！」只是性格硬頸的她，堅信要變，就要去到盡，「之前喺中學教，班女仔都好奇怪，話我Gel晒甲打鼓得唔得㗎，我話梗冇問題，醒獅一樣可以又靚又潮！」
全女班挑戰男生奪冠
明知外界對她將「舞蹈元素」帶入醒獅隊會受質疑，小女生為了服眾，膽粗粗以全女班挑戰男生參加醒獅比賽，結果一舉摘下冠軍；又選擇在「接受能力較高」的七人欖球賽，首度以「奇裝異服」的全女班水鼓隊造型亮相，贏盡老外好評。漸見成績，一直對她抱懷疑及不信任目光的師兄師弟，對這個Gel甲化妝的「辣椒仔」也開始改觀。
「我讀書唔叻，都係讀毅進、副學士，進修MBA咁讀上去，有時諗唔通都會返學校問老師，點先可以搞好間武館，有乜嘢出路。𠵱家我哋去表演都會派意見書，有次有個客同我哋講，話我哋技術好又準時，但冇笑容，結果班師兄弟返嚟，一齊對住塊鏡練笑容，佢哋肯聽我講，我都好開心，大家都係想間武館好」。正為籌辦國際獅王比賽馬不停蹄的女當家，幫得手！
