市場瘋傳政府短期再出手打壓樓市，招數包括將BSD稅率由15%勁加一倍至30%，買第二套房要額外畀稅5%等。講到真嘅一樣，搞到地產股跌到七個一皮，普遍插水逾3%，成為大跌市元凶之一。
噚日推介嘅美蘭機場（357），大跌市下股價企硬固然可喜，若果錄得顯著升幅，就肯定唔係池中物。主打中式餐飲嘅小南國（3666），噚日逆市炒高4.2%，重返招股價1.50元之餘，更一舉升穿10日及20日線，走勢靚絕，戰友不妨望多兩眼。
截至去年6月底，小南國半年賺5618萬人仔，按年增長52%，符合招股書預期，現價年度化市盈率11.9倍，餐飲股嚟講絕對唔貴，公司承諾派息比率不低於30%，折合現價息率2.5厘。小南國午後有10球交叉盤上板，每股1.35元，唔排除有動作跟尾；舊年7月上市，兜兜轉轉後重返招股價，期內恒指累升17.4%，小南國落後得可憐，保守估計短期追回大市升幅，可見1.76元，難度分唔高。
唐牛