「想買樓、跟葉劉」，呢句新民黨順口溜，原來已經過時喇，事關新民黨近期至hit金句係「想抱B、跟MT（Michael Tien）」，原來副主席田北辰身邊嘅助理兼親信，已經「兩年抱五」，包括天水圍區議員黃卓健嘅二公子、荃灣區議員趙公梃兩位公子、二少私人助理嘅細女，仲有二少前助理、即葉劉現助理肚裏嗰位千金。
二少對成功促進生育率明顯好得戚，噚日仲為此向葉劉下戰書；估唔到二少有催B神功，難怪咁關心奶粉問題啦。
港大民意研究計劃上月向逾千市民進行嘅調查就顯示，葉劉喺一班行會成員中認知度最高，林煥光同羅范椒芬緊隨其後；涉嫌偷步賣樓而休假至今嘅林奮強就排喺李慧琼之後，殺入五大。但就有66%市民喺冇提示下，噏唔出任何一個行會成員嘅名。