中原地產創辦人施永青成日都話本住「無為而治」嘅管理哲學去領導公司業務發展，估唔到就連新春利是派幾多錢都係咁「無為」。
仲有幾日踏入蛇年，中原計劃全線初四（13號）啟市，話雖如此，但做得地產經紀，點會有生意唔做呢？有生意關照嘅話，一於年中無休。
聽中原老友講，龍年前線經紀初一到初三嘅開單利是一律係1,000大元，蛇年就搞搞新意思，由各區董事話事，自行決定派發「良心利是」，隨董事心意，鍾意派幾多就幾多，至於會唔會至少金牛一張，都係由董事揸弗。
姊妹公司利嘉閣地產就打算劃一金額。利嘉閣上月破晒紀錄錄得1.6億營業額，荷包大豐收，開單利是就由龍年500蚊，加到蛇年一千大元，幾咁豪爽！