繼狼振英遇示威腰斬行花市敗走維園後，食物及衞生局局長高永文噚日去到維園年宵，出席禮義廉蛇齋餅糭檔攤開幕禮後，亦因為社民連狙擊而急急腳敗走，可見維園年宵，已成為梁班子鬆人勝地。
譚志源醒爬只去沙田
專程去撐場嘅高永文，本來好高興咁同禮義廉高層一齊「剪布」當剪綵，其後亦一臉輕鬆接受傳媒訪問，講吓近日嘅奶粉風波，點知社民連幾名成員突然殺到，喺佢後面高舉「政治分贓，影衰香港」、「查職查辦梁振英」等示威牌，仲有日前擊中狼太嘅熱賣品「你呃人」咕𠱸㖭。
可能怕被掟中啦，高永文答咗兩條問題後，突然間話「我……我有事」，「要走先」三粒字未講完，就轉身拉隊急急腳敗走；查實其他出席嘅梁班子成員，如民政事務局局長曾德成同商務及經濟發展局局長蘇錦樑，亦一早由疑似便衣警察護駕離開，用行動引證維園年宵不宜久留。
反觀噚日去咗沙田出席經民聯年宵檔開幕嘅政制及內地事務局局長譚志源，就全程風平浪靜、高高興興。有政務官話呀，查實煲呔任內最後三年，已經唔去維園改去沙田、荃灣同元朗，刻意避開示威，因為維園外嘅年宵花市較少政黨進駐。仲有政務官覺得應該將維園列為梁班子禁地㖭。
mailto:[email protected]
