一國兩制下，港人治港成為折磨人的無間地獄，從政者互相卡位勾腳，你牽制我，我夾實你，最終由阿爺話事。民建聯以為可以做議會多數派？發夢，到時到候要讓路畀班西環契仔契女如葉劉、鼠王芬、謝偉俊、龐愛蘭等人，總之建制政黨要造到山頭林立，冇人可以話到事。
梁振英成功造唐英年世界，真係大權在握？又係發夢，立法會乞票要靠西環，政改、23條冇話事權，揸數係政務官集團，政策由林鄭話事。所謂梁粉班底實際不過幾條蛋散自吹自擂，有奪權之心而無奪權之力，搞落去只會變成怨氣沖天嘅閒人。成立一堆委員會，理論上可以從官僚手上奪回政策主導權，但實行起來的關鍵，仍然取決於梁粉質素。而梁粉身處建制非主流，講咗當做咗，鮮有低調實幹之徒，成棚吹水怪。
政務官之所以難纏，因為一來佢哋鐵飯碗，可以鬥長命，而梁粉好快就鬥唔過而變成怨婦，一味埋怨。加上梁振英不得民心，任何激進改革都會被視為別有用心，冇民意基礎，試問又點打輿論戰，以外力壓制官僚呢？反過來官僚將未成熟、未經大腦之梁粉大計通知傳媒，一齊內外起哄，任何宏願大計都被一棍打死。
梁粉搞亂檔 折騰港人
梁振英借「奶荒」用民情搞大龍鳳，一時三刻的而且確可以打破官僚程序，特事特辦，政府幫市民買特定牌子奶粉，政務官不以為然，但礙於民意，大家唔出聲，任由高永文去癲。但大家明白民粹搞運動方式的施政之門一開，日後難收科，而梁粉人馬的政客特性喺起哄之後，注意力好快轉移，當做自己成功爭取，拍拍屁股走人。上次大龍鳳掃上水工廈貨倉，以為在TVB新聞做幾場show就搞掂，結果搞出大頭佛自己都未知。
反觀梁粉想主導的產業財金政策，不涉民生，又冇當前逼切性，毫無民氣可恃，梁粉政客如何能壓服官僚，免補地價去起北大嶼山十號碼頭呢？開放外勞及提供更多稅務好處畀不同行業呢？最後必定打餐死而一事無成，老董任內發生過晒。
所以呢種形式的港人治港折騰所有人，如無間地獄周而復始冇出路！
添馬男