港股大瀉，除了外圍不濟、南韓局勢緊張，還盛傳港府再出辣招壓樓市，幾大因素加埋，個市唔跌都難。要在見頂回落的市況搵食，不妨學對沖基金搵齊長短腳，買一隻沽空一隻，以對沖跌市風險。
短腳心水之選是金礦股紫金礦業（2899）及江西銅業（358），前者走勢衰到無倫，近數月的升市唔受惠，上月中更率先下跌，沽貨者頗有先見之明。日前瑞信睇金價已見大浪頂，觸發點是歐洲央行去年不惜一切挽救歐元，危機過去，金價今年將緩慢下跌，金價一向跟美元走勢，歐元勁升而美元貶值之下尚且如此，一旦美元轉強，金價更冇運行。
紫金江銅 沽空穩膽
江銅也是走勢偏弱的資源股，上月屢遭大行降評級，金價與銅價有一定關係，金價唔掂銅價亦唔升得去邊，兩股是短期沽空穩膽。
至於長倉，國策支持下風電股有機會逆市上升，至少都跑贏大市。內地報章指能源局正制定 《可再生能源電力優先上網管理辦法》，據稱電網公司必須全額購買包括風電在內的所有可再生能源。
目前由於風電不穩定，部份已上網電力無法使用，風電場浪費比率最高達40%。大唐新能源（1798）和華能新能源（958）機組利用小時因此跌近兩成，不過一旦電網要優先向風電商買電，情況將截然不同，對風電商帶來的營運槓桿十分之巨大，風電股要追回傳統電力股升幅，有排升。
歐陽風