編按：是日由盧主席秘書Joycelyn執筆。
主席唔單止食咗「糖衣禁藥」（見昨文），噚日仲爭啲因「糖衣毒藥」而險釀集體中毒事件。事緣晏晝有個乜嘢項目開發「跨部門」會議，不問可知就似政府把戲，成大班人傾完就當做咗，主席自是借故避席，不過就叫我後排旁聽，好待之後滙報。
正當我已按捺不住，準備打開手機程式之際，赫然發覺主席唔知幾時竟悄悄坐在我身旁，我都留意唔到，更何況與會人士。過咗一陣終於有人發現，會眾霎時驚醒，然後主席就漫不經心地說：「大家繼續，我咁啱改咗日程（邊有咁啱？）先嚟聽吓。其實各位都真係multi-tasked，我頭先又咁啱（又嚟呢吓）睇咗facebook最新update，同事開緊會都可以過關升呢，仲要救人一命，真係難得！」有幾位即面如死灰，只差口吐白沫。
問人攞心心 連接現實世界
搞到集體中毒，還不就是Candy Crush呢個遊戲，我亦有唔少朋友身受其害，日玩夜玩。咁多人玩，大概係遊戲設計者掌握到一般人的心理。首先，呢個遊戲會show到你喺facebook嘅朋友玩到邊一關。如果你的死對頭已經去到第121關，而你仍停留喺第120關的時候，相信閣下一定會發奮圖強，誓要超越佢為止。另外，呢個遊戲每次最多只有5條命（以「心心（Heart）」為記）。
當你玩咗5次都過唔到關，又自以為爭少少、試多次就實過到關的時候，你就需要send request向朋友求救。每當完成一個遊戲章節，進入下一個章節的時候，就需要三個朋友送張「飛（Ticket）」畀你，先可以玩落去。所以我覺得呢個遊戲最偉大的地方就是，你明明自己一個人喺虛擬世界沉淪，但又同時畀咗一個你和外在世界朋友接觸的窗口。講白啲，就係等你覺得自己冇咁「宅」。
正因呢個遊戲大熱，最近朋友facebook status都同呢個遊戲有關，一唔係：「請交出你的心。」就係：「咪再叫我玩，絕交！」芸芸當中，最頂癮的，都算係呢句：「爆機了，頓時好失落」。講到咁誇張，唔知打爆機嘅呢位朋友，會否同時覺得空虛、寂寞同埋凍呢？聽講Candy Crush有成400關咁多，能夠去到最後一關，應該花咗唔少「心」血。
為咗支持朋友的「壯舉」，我通常都會like佢過關的post，讚佢厲害，然後暗暗嘲笑「乜你好得閒咩？」轉個頭自己又會返去已滯留幾日的第147關。在完稿前一刻，剛符碌過咗關，身心舒暢，fantastic！
主席按：我早已封鎖此遊戲，所以無「心」應酬各位糖友。
Joycelyn