香港嘅蛇年郵票由殿堂級設計師靳埭強炮製，原來美國嘅蛇年郵票都係出自港人手筆。香港出世、10歲移民美國嘅藝術家麥錦鴻（Kam Mak），已經第六次參與美國郵政總局嘅賀年郵票設計，今次揀咗爆竹為主題，背後有段故。
爆竹為題有段故
以往麥錦鴻嘅設計，用過舞獅、水仙花、大紅燈籠等，今次取材爆竹嘅靈感，實情源自佢一首英文詩，大意講佢喺唐人街獨自尋找一串未燒過嘅爆竹，同時亦尋找緊自己嘅幸運，有啲悲愴。
麥錦鴻接受傳媒訪問時話，美國之所以發行賀年郵票，都係前人努力爭取嘅成果。話說美國華人團體美華協會佐治亞州分會負責人陳瑾，88年為咗促成美國社會對華人嘅肯定，不斷游說美國郵政總局發行賀年郵票，直至92年先成功；估唔到小小一張郵票，包含咁有趣歷史。