三色台有個節目叫《千奇百趣》，但論奇情，其實點夠強國嚟。官方早前公佈41個行業利潤，增長最大竟然是「要生要死」的電企，增幅高達69.1%，有分析員認為部份得力於電企多年來「喊窮」的功勞，某程度與北韓異曲同工──邊個哭得呼天搶地，就有飯食！
除了電企股，第二個喊得淒涼的可能是鐵路股。2011年，強國水緊加上業績唔靚，股價直插谷底，去年鐵路股開始穩步向上，但散戶聽到鐵路股都有餘悸。早前鐵路部公佈，今年鐵路計劃投資6,500億元（人民幣．下同），超乎預期。噚日大市腳震，在投資恢復預期下，鐵路A、H股反而爆上。
中國南車（1766）繼上月簽到百億元生意後，前日又有46億元合約，佔2011營業額近兩成。
雖然鐵路部傳併入交通部，但未能夠平衡各方利益前，相信冇咁快講掂數，加上近年南車走出去，海外投資佔比每年都倍升，股價昨逆市升4%，應能更上一層樓。
Samantha
本欄逢周一、三、五刊出