新股上市，公司通常準備份紀念品送畀港交所（388），一年閒閒地有一百幾十隻新股上市，大家有冇諗過，呢一百幾十份紀念品去咗邊度呢？
三年收二百幾件
原來呢批紀念品由港交所行政部管理，全部有晒編號，特別同體積唔大嘅，就放喺港交所展覽廳同寫字樓會議室展出，每三個月換一次。好似嬰兒車咁大件嘅，就全部存倉，港交所搵咗間物流公司幫手，將大批唔展示嘅紀念品存倉。
送紀念品係表心意，老闆同港交所代表影相時亦有嘢揸手，但根據資料，高峯期，2010年主板有106隻新股，2011同2012年分別有88同52隻新股，假設隻隻新股都送禮，港交所短短三年收咗二百幾份紀念品。
好似噚日掛牌嘅時計寶（2033）同榮陽實業（2078），又幫港交所個倉增添兩件貨。時計寶好正路咁送兩隻自家品牌嘅手錶，榮陽最叻做iPad鋁底板，就整咗幅畫，上面畫咗部用牛做wallpaper嘅iPad，實行牛一牛個市。
可惜遇着大跌市，出牛都無用，榮陽收市潛水13%，時計寶都係較招股價微升2.2%。
查實𠵱家時興環保，握手都可以影張靚相，公司老闆無謂嘥錢整件只有一時紀念價值嘅紀念品，反正大部份都係存倉，不見天日，有錢留做派息或捐公益金好過啦，CEO李小加係咪應該鼓勵大家唔使咁好禮呢？
李華華
mailto:[email protected]