衞生署卒之向醫生發信，指不同牌子奶粉內裏成分大同小異，如某隻牌子奶粉買唔到，醫生可向家長建議買過另外一隻牌子。
香港醫學會在一月三十一日亦發表聲明，所有在港合法銷售嘅嬰兒奶粉都啱食用，嬰兒轉用不同牌子奶粉並無負面影響。一位兒科專科醫生陳以誠（明報報道）指所有為六個月以下嬰兒用嘅1號奶粉仍受世衞組織限制，以接近母乳為原則，市面上各牌子奶粉大同小異，遇某隻牌子短缺，可安心轉換牌子。
前兩日左丁山在本欄所言（一月三十一日前交稿）非虛，周圍問多啲，睇多啲，就知道各位忙於撲奶粉搞到神經緊張嘅家長，可能係焦慮過甚啫，各位懷孕女士請注意，市面上只有1.5隻奶粉受搶購，你地大可預先選擇使用其他「滯銷牌子」奶粉，唔使驚冇貨。
點解係1.5隻？此乃左丁山向一位零售界大姐大請教得到嘅訊息。佢話無論本地媽咪或內地水貨客，一窩蜂咁搶購「美贊臣」（Mead Johnson），呢隻Ｍ牌現在雄霸市場，多多貨都賣晒，搞到美贊臣公司本部都要重新部署生產供應鏈。另外0.5隻就係美素佳兒，係水貨客寵物，零售大姐管轄嘅旗下分店要預留美贊臣及美素佳兒俾「媽媽會」會員取貨，又要應付人客搶購，搞到售貨員成日俾客鬧，零售大姐話只要啲家長肯轉換牌子，買其他牌子奶粉，就會大家安樂晒！
點解其他牌子有大把貨賣而媽咪唔肯買，偏要搶購美贊臣？兒科權威教授與零售大姐大都感到莫名其妙，大概係廣告做得足，推廣工夫夠完美啩。各位媽咪、準媽咪如果真係想不為嬰兒奶粉供應量發愁，請聽聽兒科專家意見，轉用其他牌子。左丁山為此而問過五位新任媽咪，呢班全部係大學畢業生，佢地全部採用非暢銷奶粉牌子，日常買奶粉全無問題，輕鬆在家享受產假，不為奶粉操心，便可悉心照顧嬰兒。可憐呀，我地嘅政府高官與議員竟然為了1.5隻奶粉牌子供應緊張，動員100名公務員幫手直銷奶粉，胡亂出招，為海關人員製造巨大壓力，為羅湖關卡製造混亂，香港人何其不幸！