【本報訊】廸生創建（113）再失名牌代理權。「名牌潘」潘廸生任執行主席兼大股東的廸生創建，昨宣佈與僅合作了兩年半的休閒服裝品牌American Eagle Outfitters（AEO）提早「分手」，獲1,000萬美元（約7,800萬港元）「掟煲費」，是集團五年內第三個失去的名牌代理權。
稱不裁員 另覓新投資
廸生昨宣佈，將於今年5月31日提前交還AEO於香港、澳門、中國及亞洲部份地區的代理權，是繼2009年失去Polo Ralph Lauren及於2010年再失Tommy Hilfiger中國區品牌代理權後，第三次被國際品牌「飛起」！
廸生傳訊部董事總經理蕭靜嫻指今次提早終止合作協議，是由AEO美國總公司主動收回品牌代理權。
她表示，現時中、港兩地共有六間AEO專門店，料於5月底前將陸續向AEO移交店舖及員工，強調不涉及裁員行動。她強調「AEO業務不屬於profit contributor，現時公司正積極尋找其他新投資。」
本報記者昨下午走訪AEO位於尖沙嘴海運大廈及美麗華商場的專門店，在逗留的15分鐘期間，約有20多名顧客進出店舖，「人氣」較附近店鋪優勝，當中不少人都有在店內購物。有業內人士指現時名牌代理的生意難做，「大品牌會自己拎返嚟做，連卡佛同I.T（999）又拎咗咁多品牌做，唔排除廸生會再有品牌流失！」
顧客點睇
黃生 貪佢夠簡單
本身鍾意American Eagle，因為貪佢嘅設計比較簡單，每次有新款就嚟買，通常消費幾百蚊至幾千蚊不等。
馮小姐 平過A&F
啱啱買咗2,000幾蚊，款式同A&F差唔多，我覺得American Eagle好似仲平啲。平時睇啱就買，無咩budget。
