又到一年一度「細股王」瑞信亞洲細價股研究部主管劉紹文（Kenny）派利是嘅時候，佢噚日公佈8隻聲稱頴爆頭先揀到嘅「利是股」，估計未來12個月加埋平均拉勻，潛在升幅有18%。
8隻利是股分別係安踏（2020）、周生生（116）、冠君產託（2778）、建滔化工（148）、中國龍工（3339）、創維數碼（751）、精電（710）同西部水泥（2233）。
Kenny認為，蛇年嘅投資策略，要好似條蛇咁能屈能伸，要夠靈活，唔少股份自舊年9月開始，升到𠵱家，估值由好平變好貴，佢都好難揀落手。
睇往績，瑞信舊年畀8隻龍年利是股，原本估升38%，結果至今平均升幅逾五成。假設每隻跟買一手，總共要7.5萬，𠵱家賬面賺3.4萬，最勁嘅康哲（867），升逾一倍，升最少嘅德昌電機（179）都賺15%，跑贏同期恒指唔夠12%升幅。