踢爆梁振英選舉黑幕嘅《陽光時務週刊》，由於內容太爆搞到賣斷市，錯過咗嘅朋友唔使擔心，皆因由今日起可以去維園年宵買番本留念。係公民黨嘅攤檔中，有陽光時務嘅銷售專員即場兜售，歡迎訂閱，只要放低30蚊，就有夢熊爆大鑊嗰期同埋最新一期嘅陽光時務，認真賣大包，平日喺街買一本都30蚊啦。
社民連檔口嘅「你呃人」白色咕𠱸相當受歡迎，噚日長毛仲攞嚟招呼敗走維園嘅梁振英。咕𠱸每個120蚊，社民連副主席吳文遠講明，不排除隨時加價，有買趁手。社記檔口亦有好多哲古華拉嘅精品，包括「哲古頸巾」，每條80蚊，聽聞相當受女仔歡迎。