咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
阿仙奴不嬲都畀人印象好識賺錢，好似領隊雲格喺轉會市場低買高賣，門票又貴人一截咁。小弟呢排研究吓德勤份去季歐洲球會財政報告，發現阿仙奴淨係識向小球迷開刀，球會傾贊助合作嘅能力似乎仲有好大嘅進步空間。
份報告將球會收入分為3類，分別係比賽、轉播同商業收益，唔包括轉會嘅收入。比賽收益包括門票、季票同會員費；轉播收益包括本土同歐洲賽事嘅所有轉播費；商業收益就係所有廣告同贊助。阿奴上季收入約2.9億歐元，排全歐洲第6，其中比賽收益係1.2億歐元，佔41%；轉播收益係1.1億歐元，佔37%；商業收益竟然只得6,500萬歐元，佔22%。
阿仙奴嘅盈利模式較特別，喺收入頭20位嘅歐洲球隊入面，佢哋係唯一一支比賽收益佔比重最高嘅球隊，其他球隊嘅主要收入來源都係贊助同轉播費。造成呢個模式嘅原因，唔單止係兵工廠門票貴，而係佢哋商業贊助嘅盈利能力偏弱。
喺收入頭11位嘅球隊入面，阿仙奴嘅商業收益排包尾，固然同曼聯、皇馬、拜仁呢啲球會差得遠，就連利物浦、多蒙特同AC米蘭都比唔上，只係同熱刺、漢堡同國際米蘭等同級。
為咗增加收入，阿奴近年不斷向入場觀眾開刀，所以佢哋比賽收益高都唔係咩新聞，但睇到呢份報告，小弟就覺得好憤怒，因為球會根本未盡力做好商業贊助收益，只係識加票價。還望阿仙奴高層好好反省，認清楚邊種方法先係增加收入嘅正道。文：咖喱