喺西甲榜首遙遙領先嘅巴塞隆拿，踏入2013年之後戰績稍為跌watt，星期日場聯賽作客華倫西亞只係以1:1逼和對手失分。話晒巴塞啱啱先踢完對皇馬場大戰，球員未回得切氣不在十足狀態都係情有可原；加上巴塞𠵱家仲有9分領先優勢，有大把本錢relax吓。
巴塞喺上星期三西班牙盃以強陣造訪皇馬，拳拳到肉下各一言和；到咗周日作客華倫，正選陣容同皇馬場波分別唔大，只係得門將域陀華迪斯同埋串演中堅嘅馬斯真蘭奴喺呢場波正選上陣。
巴塞近年作客華倫成績都係一般，今仗都要先失守，主隊喺33分鐘由班尼加先開紀錄。完半場前巴塞扳平，柏度洛迪古斯喺禁區被踢跌，12碼由美斯射入，雖然佢連續第12場西甲入波，但巴塞最後都避免唔到失分。睇番巴塞喺今場波嘅統計，唔難發現班球員真係有啲疲態，全場罕有地只係得10次射門。
馬體會贏波仲落後9分
繼續暫代領軍嘅巴塞助教佐迪洛拉賽後話：「或者我哋真係或多或少受到皇馬場波嘅影響，但我覺得對手嘅出色表現先係重點。過去5年我哋只係喺度贏過一次，可以和局收場都係唔錯嘅賽果。」
次席嘅馬德里體育會喺同日西甲贏波，喺主場1:0小勝貝迪斯，追到落後巴塞9分。不過巴塞嘅最大對手始終係皇馬，後者喺上周六爆冷輸畀格蘭納達，𠵱家巴塞都叫執番1分稍稍再拉開距離，計落其實都冇壞。另外，巴塞中場老將沙維拉傷大腿，經檢查後確定踢唔到周三國際賽，無關痛癢嘅友賽，冇壞啦。