不知道為何你會遠走，只知道習慣抱你抱了太久……哥哥，你近況好嗎？當我最近唔覺意㩒入零收視嘅亞視「歲月留聲」台，睇到《凹凸神探》裏面青靚白淨嘅你，差啲眼淚送飯啊！
2003年係驚天動地嘅一年，哥哥你喺瘟疫中離開我哋，然後我哋化悲憤為力量，上街踢走23條惡法。10年了，由老懵董到狼英，香港民主原地踏步，當年失職搞到大量醫護人員感染沙士嘅高永文因禍得福，升呢做咗局長，好多人都話冇眼睇。哥哥，你會唔會慶幸自己唔需要再受塵世間嘅痛苦？ 吳爽
沙士來了
喺2003年之前，沙士係搵林子祥唱歌推銷嘅汽水；2003年之後，沙士變咗人人聞之色變嘅非典型肺炎（SARS）。全球有779人死於呢種神秘嘅病毒，單喺香港都有299個沙士亡魂。直到今日，大家都仲未好明白點解呢個疫症會突如其來，之後又幾乎消失得無影無蹤。
哥哥走了
喺一個天意弄人嘅愚人節，當香港人都活喺殺人於無形嘅沙士瘟疫恐慌當中嘅時候，全城突然瘋傳哥哥張國榮喺中環文華東方酒店跳樓，「唔好玩啦」，人人聽到之後第一個反應都係咁。「我渴望自由，讓我衝天飛，當初的我太衝動」，哥哥死訊證實了，全城陷入一片沉痛嘅悲情，各地歌影迷傷心欲絕，文華東方酒店門外放滿鮮花嘅畫面，仍然教人難忘。
惡法推翻了
當年以保安局局長身份藐嘴藐舌硬推23條惡法嘅「掃把頭」葉劉淑儀，一句「西方民主政制並非萬應靈藥，希特拉都係民主選舉上台」，成功發動咗近50至100萬港人上街，董建華不得不收回成命，擱置惡法。香港人從未試過咁團結，之前冇，往後嘅十年都再冇見過。CY，靠你喇！
美伊打仗了
為咗報復薩達姆支援拉登恐怖襲擊紐約世貿中心，布殊老屈伊拉克政府秘藏大殺傷力生化武器，喺2003年3月攻入伊拉克。只係用咗三個月，美軍就殺入巴格達，趕走咗薩達姆政權。不過言之鑿鑿嘅生化武器根本唔存在，而美伊兩國仲犧牲咗萬幾條性命，值得咩？