咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
新不如舊，定係舊不如新？近期英超有兩隊波嘅球迷，肯定話舊好過新，一隊係利物浦，另一隊就係維拉。由於牽牛外遊，今期就由小弟分析吓。
記得羅渣士去年夏天來到晏菲路，立即招攬自己友，又波連尼又祖阿倫，反而一班舊有嘅球員，除咗地位超然嘅蘇亞雷斯外，交唔到貨嘅好似查理阿當同安祖卡路爾咁，喺夏天就執包袱走人；走唔到嘅達寧同「軒仔」佐敦軒達臣，就長坐冷板，僅得盃賽先有機會發揮下；1月轉會窗未到時，羅渣士仲講到明，如有球會肯出價收購達寧，一定會放佢走。
不過，呢兩位球員唔知係咪因為越俾人睇死，就越要爭氣，一有機會出場就搏到盡；連小弟以往對佢一向冇乜好感嘅「軒仔」，都慢慢打番喺新特蘭時嘅水準，結果去到下半季，佢哋已重返正選，相反波連尼、祖阿倫，甚至羅渣士一手提拔嘅史達寧同蘇索，經過半季以來飄忽的表現，已經失去正選位置。
維拉同利記一樣，林拔來到後，成個陣容經歷咗翻天覆地嘅變化，艾邦拉荷、戴倫賓特同尼索比亞全部都冇晒正選，但換班後成績仲衰過上季，所以最近幾場比賽，林拔唔知係咪壓力唔少，出番艾邦拉荷同尼索比亞打正選，結果兩位都踢得唔錯，至少維拉喺側擊方面加強咗，賓迪基喺前面多咗好多入波機會，唔係上周都唔可能同愛華頓踢成3:3。
講到尾最抵讚嘅，都係唔介意自打嘴巴嘅羅渣士同林拔，寧願及時回頭，都唔好錯落去，希望球隊喺下半季，可以真係有一番新景象。文：東尼