為咗打擊支聯會，一名神秘男子喺舊年10月不惜花63,000蚊，同支聯會鬥搶維園2號攤檔。噚日呢個神秘攤檔正式開業，但係估唔到呢名神秘男子竟然搵一間國際學校「過橋」，以30,000多元「租上租」畀班學生哥。學生哥話，唔知學校做租上租，只係知道賣吓貨做慈善，捐畀一個國際非政府組織KIVA。
當日同李卓人鬥搶嘅神秘男子噚日有現身攤檔，仲幫手掛起條「stop hunger」嘅橫額，遮住條寫住「天際數碼」橫額。當記者上前問佢係咪用30,000蚊租咗個檔口畀班學生哥，神秘男子左閃右避，只係推卻話「我答咗好多喇！」
半價租給國際學校
開檔嘅國際學校係「香港猶太教國際學校」，學生哥都係操流利英文，仲有鬼妹仔。學生哥話，只知道學校用咗30,000蚊租咗個舖位，等佢哋賣吓嘢，收益都係幫助有需要嘅人。檔口賣嘅嘢好普通，都係iPhone外殼同speaker，唔算靚。
至於得番一個檔口嘅支聯會，除咗每隻100蚊嘅「民主會戰勝歸來」CD外，今年仲有民主女神像嘅鎖匙扣，係23年前賣剩嘅貨尾，共有185個，民女匙扣包裝寫上「中國人至今未能實現的願望──人權、法治、自由、民主」，估唔到今時今日，情況依舊。