年宵開鑼，工黨喺維園有檔賣襟章、揮春同布袋，仲喺檔位播放主席李卓人錄音，呼籲撐工黨、要狼英落台。政治宣傳冇乜問題，弊在開大大聲公，不斷重播又重播，附近檔位經營者覺得係疲勞轟炸。
工黨對面個檔「冇花有架」不勝其煩，檔主梁先生話啲賣嘢朋友被嘈到頭痛，想合埋眼休息吓都唔得，變晒躁男躁女；最慘係客人為避開音波功，行過急急腳走，佢想同客人介紹啲產品，對方都聽唔到，做少好多生意。梁先生話，噚日下晝成功叫佢哋細聲啲，點知晚上阿人到場真人發聲，又開番大個大聲公講咗幾粒鐘，所以忍唔住要同八方訴苦。佢希望工黨好似佢哋口號respect for labour一樣，喺維園respect your neighbour。