【難返北區】
教育局承諾為今年被派到大埔小學升讀小一的北區學童，安排北區學位讓他們「回歸」，但跨境學童則不獲此安排。有子女將升小一的北區家長，質疑局方能否填滿所缺的1,400個學額；有幼兒班雙非家長則驚定先，要求教育局對所有學童一視同仁。
港媽促公佈詳情
參加統一派位的上水和跨境學童中，半數、即約850人可能被派到大埔小學，粉嶺學童人數也超額。昨日多名受訪上水幼稚園高班港媽，對教局的原區保證有位政策不太清楚，要求局方盡快公佈，霍太說：「仲差咁多個位，佢哋都冇講清楚啲位邊度嚟。」港媽容女士則稍為安心，「雙非（學童）既然嚟得香港讀書，坐多兩個站去大埔都唔拘啦」。
另一高班港媽劉太表示，月花數百元聘專人教兒子學英語，以應付叩門面試，「擔心要去大埔㗎，屋企仲有個細B，點帶佢去返學」。
雙非家長黃先生的兒子讀幼兒班，已擔心他日後要到大埔升小一，認為當局不助跨境學童返回北區，很不公平，「佢係香港人，政府都要尊重」，但他稱會無奈接受，「畢竟我哋呢幾年對香港影響好大，雙非霸咗學位，可以體諒北區家長不滿」。
《蘋果》記者