噚日係立春，玄學上已經踏入蛇年，八方找來政黨巨頭為《蘋果》讀者寫吓揮春，拜個早年，希望香港人喺狼英當道下，新一年輸少當贏。
羅健熙揮筆揶揄劉江華
做咗民主黨副主席嘅羅健熙就寫咗張「輸都變贏」嘅揮春，當然係揶揄禮義廉劉江華輸咗選舉，竟然贏咗份月入20萬嘅副局長肥缺，所以希望香港人喺未來一年，趕走呢啲「靠輸上位」嘅庸官，一人一票選特首、全面普選立法會。羅健熙話，香港要贏，市民一定要走上街頭，畀政府聽到人民嘅聲音。
退下火線嘅公民黨主席余若薇寫咗張「飯糰、泛團」揮春，希望港人未來一年衣食豐足，又寄望泛民主派團結起來，為市民爭取真普選，廢除功能組別。民主女神話：「全社會都希望民主派團結，政改係重要議題，泛民一定要團結，要好似飯咁樣『黐𣲷𣲷』同市民爭取。」該黨毛孟靜就整咗張「本土為先」揮春，希望政府唔好吓吓都係北望神州搵人仔，顧吓香港人感受。
支聯會張文光就寫咗「香港有夢」、「平反六四」嘅揮春畀讀者，話香港人希望平反六四已踏入第24年，一直堅持到𠵱家：「香港人仲有一個普選夢，唔係望再喺梁振英同梁粉蛇鼠一窩，希望還香港人真普選。」
不過論創意，都不及新民主同盟嘅丘文俊，佢噚日喺北區寫咗一張類似「招財進寶」嘅合成揮春，將「趕清水貨客」五粒字合成，相信受水貨滋擾最嚴重嘅北區，家家戶戶都應該好鍾意。
mailto:[email protected]
