歲晚跨年，朱咪咪火熱，在電視劇《老表，你好嘢！》戲份吃重；演唱會一票難求，壓根兒不用這篇訪問宣傳；她揭露10多年來與澳門江湖猛人尹國駒（崩牙駒）一家淵源極深，一時風頭無兩。
去年底崩牙駒出獄，替媽媽筵開133席賀壽，並請朱咪咪當司儀，才揭露她與駒媽情同母女，難得她不怕崩牙駒，「我點會驚，我又冇得罪佢，尤其佢阿媽又咁錫我，佢唔會對我點」。老娘，你好嘢！ 記者：陳勝藍、譚淑美 攝影：胡堅、金文
朱咪咪行年五十有九，見慣風浪，但回想10多年前深入虎穴，藝人鍾淑慧找她與「細龜」黃一山過大海，首次替駒媽唱歌賀壽，還是讓她大開眼界，「我諗我見過最大嘅場面，就係第一次同佢哋唱生日歌，好似拍戲，個個着黑色西裝、白色恤衫，打呔，個個一set，直情好似睇緊江湖片！」
Men in black有的打麻雀、有的推牌九，吆五喝六，當時黃一山憑《逃學威龍》走紅，有人認出了他，喝道：「細龜，埋嚟玩兩手！」黃一山跑慣江湖，忙道：「多謝多謝多謝！」話音未落，腳底抹油，入到休息室才說：「嘩，叫我玩兩手，分分鐘今晚白唱！」
那時候朱咪咪有眼不識崩牙駒，「我又唔知佢叫崩牙駒，我哋過去做生日之嘛，點會問：『邊個係你個仔呀？』」一、兩年後崩牙駒入冊，天天見報，她如夢初醒：「哦，原來駒媽個仔咁犀利」。
「我好有老人家緣」
也不知是駒媽找人代替愛兒，還是天生跟咪咪姐投緣，「佢媽咪好鍾意我，之後10幾年生日都係我過去，我再叫多一、兩個藝人開生日party；有時我過去澳門，我同佢飲茶，佢又過嚟聽我演唱會」。也不怕惹是非，「我又唔係江湖人，又冇江湖背景，邊度有人叫我做嘢我就去，過去駒媽生日我年年都到，一半同佢賀壽，另一半做嘢」。
若為工作，又怎會送金壽字給駒媽？駒媽又怎會以金豬回禮？記者問咪咪姐，到底駒媽喜歡她甚麼？「我好有老人家緣，譚炳文阿媽都好鍾意我，譚炳文當咗我係契妹」。
她跟崩牙駒弟弟尹國雄也熟稔，「熟，佢啲家姐阿妹全部都熟」。駒媽有五名子女，最疼還是尹國駒，「如果我星期六、日開演唱會，佢絕對唔會嚟睇，佢每逢禮拜六要去探阿駒」。咪咪姐個唱在即，問過駒媽：「今次演唱會又係星期六、日喎，你會唔會嚟？」對方一口答允：「唓，𠵱家都唔使去探佢啦！」
崩牙駒出冊後，即成澳門警方眼中釘、肉中刺，他卻在漁人碼頭替媽媽搞壽宴，朱咪咪、黎耀祥、方伊琪均有到賀，駒媽叫咪咪姐與崩牙駒合唱一曲，她卻耍手擰頭，倒不是怕，「駒媽問我，係咪驚記者影咗登出嚟，我話唔係，我行得正企得正，我從來唔驚呢啲嘢，只係當晚個個都係男子漢，點會同我呢啲師奶唱歌？」
不施脂粉無客問津
朱咪咪原名朱月美，生於馬來西亞怡保，爸爸當理髮師，與九名子女蝸居80呎房間，「加埋我阿媽10個人，其實我對落有兩個妹，俾我踢走咗，出世冇耐死咗……我媽話我腳頭硬」。
她有老人家緣，卻沒書緣，小學四年級還跟ABCD搏鬥，唸到六年級卻沒考畢業試，「其實我小學都未讀完」。做大戲的姊姊帶她到新加坡學唱歌，17歲到夜總會獻唱，見盡百態，「星馬（客人）會叫歌手坐枱，以為我哋出嚟唱歌，就可以做埋嗰樣嘢」。咪咪姐自言當時純如A4白紙，不施脂粉，無客問津，因此失業，「唱酒吧happy hour，三蚊雞（坡紙）一日，都要俾人炒！」
後來唱酒廊，月掙1,300元，還要供弟弟到英國留學，她腳頭硬，頸更硬，「我供細佬去英國三年，我話過佢未讀完書我唔會結婚！」就在那時候到香港碰運氣，「嚟香港時，係我最清倉之時」。
到香港後要靠香港夜總會去信移民局，替她申請工作證，「好彩我工作嘅夜總會都好願意畀信我」。日跑六場，1979年在油麻地華盛頓夜總會，甚至跟徐小鳳同場演出，但到多年後與尹光同台演唱，才廣為人知。
如今名成利就，卻省吃省用，錢都留給遠在新加坡的丈夫、兒子、母親，「我覺得可能我前世欠落好多，或者我離鄉別井得多，我好照顧我家人」。