就快農曆新年，呢排好多教協會員都上咗去旺角同銅鑼灣嘅教協辦年貨，如果有留意，旺角教協嘅超市幾乎被清倉，好多貨都冇晒。聽副會長張文光講，旺角教協將大裝修，所以教協減少入貨。裝修期由今個月14號情人節開始到下個月13號，休業四個星期，下月會以全新面目示人。
教協旺角嘅田園書局約滿，嚟緊會由喺美孚頂唔住貴租結業嘅紫羅蘭書局「替補」。最特別嘅書店唔單止較田園大，仲會有咖啡閣，等會員可邊飲咖啡邊睇書，配合教協年輕化嘅目標。除咗有新書店，教協會喺八樓增設一個龐大嘅醫療中心，集西醫、中醫、物理治療、內窺鏡中心同埋X光服務，九樓仲會有牙科中心同埋面積大咗嘅超市。