包包發功，我哋一家提早過肥年！香港桌球「1哥」傅家俊（Marco）囡囡晞媛（包包）認真好腳頭，佢上年12月22號先出世，已經帶挈老竇比賽贏完一個又一個，噚晚趁爹哋喺柏林打德國桌球大師賽決賽前夕，包包又再發功；雖然同爹哋第一次分隔兩地，但都擺咗個「一飛沖天」姿勢，仲喺媽咪嘅微博寫住：「爸爸加油努力，一飛沖天去，Enjoy the game，我睡着支持您。」
35歲嘅Marco今季成績唔錯，先喺去年7月澳洲公開賽殺入4強、兩個月後殺入UKPTC（英國職業桌球員錦標巡迴賽）第3站決賽，雖然最後得亞軍；但包包出世後，Marco威力有增冇減，上月先贏中國公開賽外圍賽，攞到3月決賽圈資格；跟住就係今次獨自從倫敦飛去柏林打德國大師賽，前晚4強對賀健士，足足打咗4個幾鐘至當地凌晨12點半。Marco雖然落後0:2，但氣定神閒嘅佢喺第7局竟然打出一棒142度，最終贏6:4入決賽，穩袋約33萬港元獎金；若決賽能擊敗卡達，冠軍獎金高達約63萬港元㖭！嘩，呢筆錢足夠買2,000幾罐奶粉，包包有排飲囉！
「囡囡係我主要動力」
不過美中不足係兩母女唔會飛去柏林，只會留喺倫敦睇直播同爹哋打氣。Marco都話今次成績囡囡功勞不少：「第一次做父親就打入世界排名賽決賽，這對我來說好重要，因為囡囡係我主要動力。若能喺決賽贏個錦標畀囡囡，就當係畀囡囡嘅bonus囉。其實包包出世後，我嘅練習係以往嘅三分之一，好多時冇覺好瞓；但囡囡令我喺適當時候抽離桌球，對我很有幫助。」
Marco今次打入德國大師賽，對佢嘅信心真係幫助好大，𠵱個係佢自08年英錦賽決賽後，再次殺入大賽決賽。如順利勝出，會係Marco繼07年格蘭披治賽後，另一個世界排名賽冠軍，對現時世界排名23嘅Marco喺排名上好有幫助；之但係來季世界前16位球手，同樣要打外圍賽，Marco對此表示支持。
「火箭」向明星女友求婚
另外，唔知係唔係見到Marco咁幸福，連37歲休戰中嘅「火箭」奧蘇利雲，都想搵番幸福，佢上星期使咗約67萬港元買咗隻鑽戒求婚，對象係大佢4歲嘅失婚明星Laila Rouass。搵到愛情滋潤，唔知呢位已有兩子女嘅球星，會唔會復出球壇，打啲好波畀觀眾睇呢？