【租戶心酸】
「想安安樂樂過年都唔得啦。」瓊華中心商戶凌小姐慨嘆，日前收到最遲年中租約期滿後要遷出商場的通知，面前是找舖位及減價清貨等連串經營難題。經營精品店的她，12年前因附近的嘉樂商場迫遷，在瓊華經歷了沙士及金融海嘯等最艱難歲月，看到業主終止租約通知書上「生意興隆！身體健康！新年快樂！」等三句祝福語，倍感淒涼，「大財團做旗艦店招呼自由行，同區好難搵到舖位。」
對比紮根商場多年的老商戶，經營時裝店的羅先生，去年10月因尖沙嘴DNA商場迫遷，才轉到瓊華開業，沒想到四個月後再被迫遷，他不諱言訂立租約時，毫無預兆業主會收樓，還用上20多萬元裝修及入貨，「我哋小市民點可能隨便攞到咁多錢出嚟？點可能對抗地產霸權？咁即係叫大家唔好做零售，淨係做自由行，香港人會開心咩？」
《蘋果》記者