噚日北京嘅「分餅仔」全國政協名單一出，新地非執董、本身係政協常委嘅郭炳湘被搣柴，佢兩個細佬炳江、炳聯都唔喺名單入面，唔少人以為新鴻基係大輸家，但實情又未必係咁，因為郭炳江都叫分到多少「餅碎」，佢除咗順利連任上海市政協常委之外，佢個仔郭基煇亦獲委任做廣東省政協，算冇咗個橙執番個桔！
不過連桔都冇個嘅郭炳湘就好唔高興！有大K（郭炳湘）身邊嘅人就話，大K假假地係少數公開撐狼英嘅地產商，冇功勞都有苦勞，而佢又唔係好似兩個細佬咁俾廉署拘捕，有乜理由炳江有「餅碎」，佢冇不特止仲要被搣柴？大K身邊嘅人話佢𠵱家好心淡，仲同身邊人講，原來挺狼會冇運行，試問以後仲有邊個商界會出嚟挺梁？