星爺周星馳近排忙到甩轆，事關佢籌備經年嘅賀歲電影《西遊．降魔篇》，嚟緊周四會上畫，負責製作《西遊》、星爺做大股東嘅比高集團（8220），喺緊接嘅周五又會公佈第三季業績，仲撞正年廿八𠻹，唔知星爺有冇時間洗邋遢呢？
電影宣傳大晒
作為廣東省政協委員新丁，星爺早前出席會議遲大到，開幕同閉幕禮更係人影都冇，俾其他委員同網民狂轟唔履行職責，佢就話因為要參與《西遊》宣傳活動，一早向政協方面請咗假。
睇見星爺咁落力，股民就用真金白銀支持，比高上周五率先炒高近13%，收報0.26元，成交量仲大增七倍至3,481萬股，連帶有份參股《西遊》嘅文化中國（1060），都逆市升近4%。查實星爺不停穿梭報紙A、B、C疊，身手仲敏捷過孫悟空，活脫脫係西遊記真人版！