【赤鱲角機場】梁朝偉為咗電影《一代宗師》，喺香港抱恙都做咗一輪宣傳，前晚大約十點，戴住鴨嘴帽、口罩嘅偉仔喺電影公司五、六個工作人員陪同下，現身赤鱲角機場航空公司頭等櫃位，辦理登機手續，準備飛去柏林，同行仲有偉仔媽咪，但就未見老婆劉嘉玲。
問偉仔係咪去影展，佢冇出聲但有點頭示意，原來因為《一》片係第63屆柏林影展開幕電影，偉仔會出席宣傳，遲啲仲會去埋美國、韓國宣傳。
電眼連環發功
問偉仔係咪要農曆年後先返香港？佢點頭回應，再問佢有冇帶利是去派，偉仔即刻睩大眼望一望。問到嘉玲係咪一齊去？偉仔對眼再睩大啲，偉仔最煞食嘅電眼連環發功。搞掂登機手續之後，偉仔入閘時都跟足規矩，好乖咁除低口罩同帽，做個奉公守法嘅好市民。
採訪、攝影：黃曉程、梁繼光
