「老馬有火，非同小可」，近年喺英超發展唔如意嘅前英格蘭「神童」奧雲，喺上周六史篤城作客阿仙奴嘅英超聯，難得可以後備入替，點知就同兵工廠嘅中場阿迪達起衝突，送咗一記右拳俾阿迪達；而兵工廠小將韋舒亞更單挑奧雲，認真冇大冇細；奧雲今役起火，隨時俾英足總秋後算賬！
韋舒亞做「架兩」
33歲嘅奧雲雖然曾經係英超甚至歐洲一等一嘅前鋒，但俱往矣！咁喺上周六球隊作客阿仙奴時，奧雲雖然喺84分鐘先被換入，佢仍然好努力想爭取表現；點知喺補時階段嘅92分鐘，佢就因為不滿兵工廠中場阿迪達對佢嘅硬朗攔截，企番起身想郁手打對方，不過佢嘅右拳最後只係輕輕咁揩中阿迪達嘅右肩；而球證科爾好似睇唔到整件事，最後口頭警告雙方了事。
不過，一向係好事之徒嘅小兵韋舒亞，見到隊友被打，就即時上前幫拖；21歲嘅佢就去單挑英格蘭老前輩奧雲，仲表情做足加埋誇張嘅身體語言咁同佢理論㖭！事後阿仙奴領隊雲格就以睇唔到事發經過為理由，冇評論呢件事。
報復行為或有手尾跟
史篤城領隊普利斯就話奧雲唔抵幫，佢話：「雖然我覺得阿迪達嘅攔截的確好肉酸，但奧雲都唔應該咁做，佢應該留俾球證處理。」當被問及佢認為奧雲會唔會被秋後算賬時，佢話：「事情無法改變，如果英足盃要調查，佢地自然會處理，以及有相應嘅行動。」其實喺2010年艾朗藍斯被史篤城嘅梳爾哥斯踢斷腳之後，兩隊交手啲飛沙劈石嘅鏡頭特別多，喺上周六嘅比賽之後，史篤城嘅約拿芬禾達斯就勇戰爆缸要縫6針，而梳爾哥斯則被哥斯尼踢傷小腿，要縫4針。