港資證券行早幾年被銀行搶市佔率，搶到有氣冇碇唞，主要原因係銀行率先使錢優化網上證券買賣系統，令銀行用戶買股唔使事先過數，㩒個掣就得，認真方便，當時打死咗唔少傳統由經紀落盤嘅證券行。不過，時移世易，近年有幾間券商可以跑出，原因係網上證券買賣系統做得唔錯之餘，佣金又明顯低過銀行，抽新股孖展易話為，又有唔少新穎、貼身服務推出，所以有能力喺銀行手上搶番生意，耀才證券（1428）就有唔少新諗頭，成為港資券商嘅先驅。
耀才幾乎放棄咗用傳統經紀落盤業務，專心投資網上交易系統，早幾年有大水喉提供資金，壯大規模，吸納咗好多散客。近半年港股升市，令散戶重燃炒股興趣，耀才主席葉茂林就表示，1月份佣金比之前幾個月份，急升接近一倍。
中線目標1.2元
另一方面，耀才最近亦講到，員工薪酬會加5%至18%，仲會出花紅，證明生意的確好，要用銀彈政策挽留人才。相反，部份港資證券行就冇人工加又冇花紅出，咁慳皮，生意唔慌好，此消彼長之下，耀才個餅自然再做大。如果閣下認為股市今年會炒得更火熱嘅話，耀才生意一定嘭嘭聲升。
股壇長毛David Webb講過，睇一隻股票基本因素好壞，其中一樣重點係僱員人數，一間公司請多咗人，就證明公司睇好自己能夠擴充，係好兆頭。
睇番舊年9月底，耀才有245個員工，較半年前增加9個，雖然數目小，但當時股市氣氛未去到𠵱家咁旺，員工有多冇少，對一盤生意嚟講已經係好現象。
就講截至舊年9月底嘅半年業績，收入跌一成到1.1億元，純利跌5%至3135萬元，全面攤薄供股因素嘅每股盈利約3仙左右，淡市中表現已經唔差。下半年度以至打後，耀才股票佣金收入上升之餘，未來仲會做埋外滙同黃金買賣生意，業績幾可肯定見底回升，股價短線整固，似造旗，博得過，中線睇1.20元，問題不大。
晉佳
本欄逢周一、三及五刊出